Samþykktir Landsgildisins má lesa og/eða prenta

Samþykktir (lög) Landsgildisins:

1. grein - Nafn og merki

Samtökin heita St. Georgsgildin á Íslandi, í daglegu máli nefnd Landsgildið. Landsgildið er samband St. Georgsgilda og skátagilda, sem eru félög eldri skáta og annarra velunnara skáta-hreyfingarinnar. Félagar þess nefnast gildisskátar. Merki samtakanna er rauð lilja á grunni hvíts smára. Varnarþing Landsgildisins er í Reykjavík.

2. grein - Erlend samskipti

Landsgildið er virkur aðili að Alþjóða samtökum gilda "The International Scouts and Guide Fellowship", skammstafað ISGF. Áherslu skal leggja á gott samstarf Norðurlandagilda, t. d. með samvinnu landsgildismeistara Norðurlanda og norrænum gildisþingum.

3. grein - Markmið

Markmið St. Georgsgildanna og skátagildanna er að gera að veruleika kjörorðið "eitt sinn skáti, ávallt skáti" með því:

1. ...að vera tengiliður til eflingar milli skátahreyfingarinnar og eldri skáta
2. að brýna fyrir gildisskátum að vera hjálpsamir og nytsamir þjóðfélagsþegnar með sterka ábyrgðartilfinningu
3. að útbreiða skátahugsjónina og veita skátahreyfingunni stuðning
4. að flytja sannan skátaanda út í þjóðfélagið
5. að treysta gott samband við Bandalag íslenskra skáta

4. grein - Aðild

Rétt til að sækja um inngöngu í Landsgildið hafa þau gildi sem starfa í anda St. Georgsgilda og skátagilda og hafa samþykktir, sem ekki brjóta í bága við samþykktir þessar. Umsókn um inngöngu skal vera skrifleg og skulu samþykktir viðkomandi gildis fylgja með umsókn. Umsóknina skal senda Landsgildisstjórn. Landsgildisstjórn getur samþykkt inngöngu nýs gildis, en leita skal staðfestingar á þeirri ákvörðun á næsta reglulega Landsgildisþingi. Heimilt er að samþykkja inngöngu einstaklings í Landsgildið, þegar sérstaklega stendur á,, til dæmis ef gildi er ekki starfandi í heimabyggð hans.

5. grein - Um gildin - gildisheitið

Hópur eldri skáta eða áhugamanna um málefni skátahreyfingarinnar getur stofnað gildi, enda séu lög þess og starfsreglur í samræmi við samþykktir Landsgildisins.

Landsgildið skal hafa til staðar drög að samþykktum fyrir gildi. Hvert gildi getur fellt drög þessi að stað- og starfsháttum sínum.

Allar breytingar, sem kunna að verða gerðar á samþykktum gilda, eru háðar samþykki Landsgildisstjórnar. Gildisskátar geta þeir orðið, sem náð hafa 18 ára aldri, hafa verið skátar eða hafa áhuga á starfi skátahreyfingarinnar og hafa unnið gildisheitið.

Við inngöngu í gildi skal nýr félagi vinna svohljóðandi heit: "Ég lofa að leitast við að lifa lífi mínu í samræmi við hugsjónir skátahreyfingarinnar og markmið gildanna."

Gildin taka hvorki afstöðu í trúmálum né stjórnmálum.

Gildin greiða árgjald til Landsgildisins, er miðast við félagafjölda. Árgjaldið er ákveðið á Landsgildisþingi til tveggja ára í senn.

Á Landsgildisþingi skal talsmaður hvers gildis leggja fram og flytja skýrslu um störf þess frá síðasta Landsgildisþingi.

6. grein - Landsgildisþing

1. Landsgildisþing skal halda á tveggja ára fresti í apríl eða maí. Landsgildisstjórn er heimilt að kalla saman aukaþing, ef þörf krefur eða þrjú gildi óska eftir því. Lands-gildisstjórn ákveður þingstað. Boð um þing skal sent gildum með minnst 30 daga fyrirvara ásamt dagskrá. Landsgildisþing fer með æðsta vald um málefni gildanna.
2. Í upphafi þess árs, sem Landsgildisþing er haldið, skal hvert gildi tilnefna einn mann í uppstillingarnefnd til stjórnarkjörs og kjörs skoðunarmanna reikninga Landsgildis. Formaður uppstillingarnefndar skal vera fulltrúi þess gildis, sem annast þinghaldið hverju sinni.
3. Uppstillingarnefnd leggur fram tillögu um jafnmarga menn og kjósa skal í stjórn, svo og um skoðunarmenn reikninga, og tilgreina frá hvaða gildi hver þeirra er.
4. Rétt til þingsetu með öllum réttindum hafa allir gildisskátar.
5. Þinghald skal miðað við, að þingið geti jafnframt verið kynningarmót gildisskáta.
6. Landsgildismeistari setur Landsgildisþing og skipar því fundarstjóra og ritara.
7. Þingfundum skal stjórna samkvæmt þingsköpum Landsgildisins.
8. Einfaldur meirihluti ræður úrslitum í öllum málum, nema samþykktir Landsgildisins mæli fyrir um annað.

7. grein - Dagskrá Landsgildisþings

1. Þingsetning
2. Skipun tveggja fundarstjóra og tveggja fundarritara
3. Lögð fram skýrsla stjórnar og endurskoðaðir reikningar til umræðu og afgreiðslu
4. Starfsskýrslur gilda
5. Breytingar samþykkta
6. Uppstillingarnefnd leggur fram tillögur sínar
7. Kosning Landsgildismeistara
8. Kosning 6 stjórnarmanna í einu lagi
9. Kosning tveggja skoðunarmanna reikninga og eins til vara
10. Ákveðið árgjald til Landsgildis
11. Önnur mál

8. grein - Landsgildisstjórn

1. Landsgildisstjórn skal skipuð 7 mönnum. Landsgildismeistari skal kosinn sér-taklega. Er hann ekki rétt kjörinn nema með meirihluta atkvæða. Aðrir stjórnarmenn skulu kosnir sameiginlega. Kjörtímabil stjórnar er tvö ár. Æskilegt er að sem flest gildi eigi fulltrúa í stjórn. Ekki skal stjórnarmönnum skylt að taka kosningu nema eitt kjörtímabil.
2. Landsgildisstjórn skiptir með sér verkum er skulu vera: Vara-landsgildismeistari, ritari, gjaldkeri, erlendur bréfritari, spjaldskrárritari og útbreiðslu- og blaðafulltrúi.
3. Landsgildisstjórn skal framkvæma samþykktir Landsgildisþings og ákvarðanir laga þessara
4. Landsgildisstjórn annast allan daglegan rekstur, svo og samband við einstök gildi og erlend sambönd
5. Landsgildisstjórn skal vinna að vexti og viðgangi St. Georgsgilda og skátagilda á Íslandi
6. Stjórnarfundir teljast löglegir, ef meirihluti þeirra er fundinn eiga að sitja er mættur

9. grein - Reikningsár

Reikningsár Landsgildisins er almanaksárið

10. grein - Málgagn Landsgildisins

Málgagn Landsgildisins, Bálið, skal ekki gefið út sjaldnar en tvisvar á ári.Því er ætlað að flytja fréttir og myndir frá starfi gildanna og annað áhugavert efni til kynningar á starfi þeirra. Landsgildisstjórn leitar eftir samkomulagi við gildin um að þau skiptist á um að annast ritstjórn og útgáfu blaðsins, tvö ár í senn. Það gildi sem annast útgáfuna hverju sinni skipar ritnefnd og skal einn nefndarmanna vera ábyrgðarmaður blaðsins.

Þegar gildi skilar af sér útgáfu blaðsins til annars gildis, skal fara fram uppgjör við Landsgildið. Senda skal öllum gildisskátum Bálið, þeim að kostnaðarlausu. Jafnframt skal senda það öllum skátafélögum landsins, Bandalagi íslenskra skáta, hjálparsveitum skáta, Landsgildum Norðurlanda og ISGF.

11. grein - Félagsslit

Hætti Landsgildið störfum og verði ekki endurvakið innan fimm ára skulu eignir þess renna til Bandalags íslenskra skáta.

12. grein - Breytingar samþykkta

Tillögur til breytinga á samþykktum skulu hafa borist Landsgildisstjórn eigi síðar en 1.mars þess árs, sem Landsgildisþingið er haldið og skulu þær sendar gildunum eigi síðar en með þingboði. Samþykktum þessum verður ekki breytt nema með minnst 2/3 hlutum greiddra atkvæða á reglulegu Landsgildisþingi.

13. grein - Gildistaka samþykktanna

Samþykktir þessar voru gerðar á Landsgildisþingi í Reykjavík 3.maí 1997 og öðlast þegar gildi.