Hugmynd að samþykktum fyrir ný St. Georgsgildi eða skátagildi:

1. grein:

Þar komi fram nafn gildisins, heimili þess og varnarþing. Félagar þess nefnast gildiskátar. Gildið er aðili að Landsgildinu.

Æskilegt er að orðið St. Georgsgildi eða skátagildi komi fram í nafni þess.

2. grein:

Markmið gildisins er að gera að veruleika kjörorðið "eitt sinn skáti, ávallt skáti" með því:

• að vera skátastarfi á félagssvæðinu til eflingar og styrktar
• að brýna fyrir félögum gildisins að vera hjálpsamir og nytsamir þjóðfélagsþegnar með sterka ábyrgðartilfinningu
• að útbreiða skátahugsjónina og veita skátahreyfingunni stuðning
• að flytja sannan skátaanda út í þjóðfélagið

(Gildið getur að sjálfsögðu sett sér fleiri markmið, en æskilegt er að ofangreind markmið séu í samþykktum þess)

3. grein:

Félagar í gildinu geta allir orðið, sem orðnir eru 18 ára og hafa verið skátar eða eru velunnarnar skátahreyfingarinnar.

4. grein:

Nýir félagar í gildinu skulu vinna eftirfarndi gildisheit:
"Ég lofa að leitast við að lifa lífi mínu í samræmi við hugsjónir skátahreyfingarinnar og markmið gildanna."
(Að hafa gildisheitið í samþykktum sínum er skilyrði þess að Landsgildisstjórn sé heimilt að samþykkja aðild gildisins að Landsgildinu)

5. grein:

Gildið tekur hvorki afstöðu í trúmálum né stjórnmálum.

6. grein:

Ákvæði um fjölda manna í stjórn og varastjórn, hvernig þeir skuli kosnir og hversu langt kjörtímabil þeirra sé. Kosning tveggja skoðunarmanna reikninga og eins til vara.

Ákvæði um fastanefndir innan gildisins.

7. grein:

Reikningsár gildisins er almanaksárið. Árgjald skal ákveðið á aðalfundi til eins árs í senn.

8. grein:

Aðalfund gildisins skal halda í …..mánuði ár hvert.

Hvernig á að boða hann og með hvaða fyrirvara minnst.

Dagskrá aðalfundar skal vera:

1. Setning fundar, skipun fundarstjóra og ritara
2. Skýrsla stjórnar
3. Skýrsla gjaldkera, lagðir fram endurskoðaðir reikningar
4. Umræður um skýrslu stjórnar og gjaldkera, reikningar síðan bornir upp til samþykktar
5. Breytingar á samþykktum gildisins
6. Kosningar samkvæmt ákvæðum samþykkta gildisins
7. Önnur mál

(Í 6. lið er gott að telja upp þá sem kjósa skal til glöggvunar fyrir fundarstjóra og fundarmenn)

9. grein:

Aðalfundur er æðsta vald gildisins, en stjórn félagsins fer mað það vald milli aðalfunda. Stjórnin sér um allan daglegan rekstur gildisins undir forustu gildismeistara.

Gildismeistari ákveður boðun funda og er talsmaður gildisins inn á við ogút á við.

10. grein:

Ákveði gildið að hætta störfum, eða starfsemi þess leggst niður einhverra orsaka vegna, skulu eignir þess fara til Landsgildisins til varðveislu. Verði nýtt gildi stofnaði á viðkomandi stað innan 10 ára skulu eignirnar renna til þess gildis. Hafi ekki verið stofnað nýtt gildi á staðnum innan 10 ára frá því að gildið hætti starfsemi renna eignirnar til Landsgildisins. Kannski kýs gildið fremur að láta eignirnar renna til skátafélagsins á staðnum.

11. grein:

Samþykktum þessum verður ekki breytt nema á aðalfundi og verða minnst 2/3 fundarmanna að samþykkja breytingarnar. Gott er að taka fram fyrir hvaða tíma og hvert þarf að koma tillögum um lagabreytingar til þess að heimilt sé að taka þær til meðferðar á aðalfundi, svo og hvernig þær skuli kynntar gildisfélögum.

12. grein:

Samþykktir þessar voru samþykktar af aðalfundi gildisins …………. og eru í gildi, þar til löglegur aðalfundur ákveður annað.