Loksins loksins!!!!!

Hér er Jorge, gestgjafi Íslendinganna í Santíagó að fylgjast með hvort Helga Rós borði að hætti Chilebúa

Nú erum við í Santíagó hjá honum Jorge vini okkar og félagsforingja skátanna sem við dveljum hjá hér í borg. Móttökurnar hafa verið einu orði sagt æðislegar og fólk stoppar okkur á götu með bros á vör bara til að láta okkur vita hversu velkomin við erum.

Við gistum í íþróttahúsi ásamt skátum frá Úrgúgvæ og Slóveníu og héldum einmitt kvöldvöku með þeim í gær þar sem við kenndum Slóvenunum alls kyns leiki og þeir okkur, þar með talinn leik sem við lærðum af Þjóðverjum á jamboreeinu.

Þetta er frábær staður, reyndar klósett og svoleiðis kannski fremur framandi en það er að sjálfsögðu aðeins hluti af upplifuninni! :o) Þarna eru einnig starfræktar sumarbúðir fyrir fátæk börn af svæðinu þar sem þau dvelja 200 saman í eina viku við uppbyggilega leiki og störf og eru þau manna brosmildust við þessa skrítnu útlendinga sem allt í einu hafa hertekið svæðið.

Við komum hingað á miðvikudag og skelltum okkur að sjálfsögðu að hætti íslenskra í verslunarleiðangur og gekk vel!!!

Á fimmtudaginn fórum við í langa rútuferð um bæi og þorp í nágrenni Santíagó. Á leiðinni skoðuðum við m.a. bæinn Valparaiso, fórum þar í kláf upp á fjall og á veitingastað þar sem við fengum mat í skömmtum fyrir þrjá. Þ.e. við borðuðum þrjú og þrjú af hverjum disk og lá við slag um matinn á sumum diskum! Þá enduðum við á ströndinni Costa Azul (Bláa ströndin). Þar lentum við í fyrsta sólarlausa tímanum okkar í Chile (dæmigert!!!). Við létum það þó ekki á okkur fá heldur stilltum á dæmigerða íslenskt vatnasafaríisstillingu og héldum hálfber út í 15 stiga hitann ákveðin í því að synda í Kyrrahafinu í byrjun janúar. Það var vægast sagt æðisleg upplifun, þótt lítið yrði um sólböð, að berjast við Kyrrahafsöldurnar sem við hlupum á móti, létum brotna á okkur þangað til þær fleygðu okkur aftur á bak í átt til strandar. Við spruttum þó tvíefld upp og réðumst á þær næstu.

Frá Santíagó

Föstudagurinn fór í skoðunarferðir um Santíagóborg. Við heimsóttum n.k. Árbæjarsafn, þ.e. gamalt lítið þorp með safni þar sem við skoðuðum gömul chilesk áhöld og fatnað. Þá kíktum við á náttúrugripasafn og á safn um suður-ameríska menningu frá því fyrir tíma Kólumbusar. Var þetta mjög áhugavert þó hitinn gerði okkur svolítið erfitt fyrir. Við erum þó farin að venjast honum nokkuð vel að því undanskildu að nokkrir hafa verið að kljást við ákveðinn slappleika og hósta en með jákvæðu hugarfari reddast það allt!!! Dagurinn endaði síðan á markaði þar sem við létum greipar sópa og tók fararstjórninn þar fyrirmyndarhlutverk sitt sérstaklega föstum tökum! :o)

Í morgunn sendum við skátana út af örkinni í faðm sinna nýju fjölskyldna í Santíagó og hefur ekki til þeirra spurst síðan...

Borgarleikhúsið í Santíagó

Reyndar hringdum við í þau áðan og fengum miklar og góðar fréttir af gangi mála hjá hverju og einu. Þau eru því þegar þetta er skrifað að öðlast þá einstöku upplifun að vera gestir í heimahúsi í Chile. Mátti vart á milli sjá hvor hópurinn var spenntari í morgunn skátarnir eða fjölskyldurnar og fáum við að heyra alla sólarsöguna á morgunn.

Þá verður ferðinni heitið í sundlaug sem staðsett er einhversstaðar uppi í fjöllunum og munum við örugglega fara víðar og kynnast enn fleiru ef við þekkjum vini okkar Jorge og félaga rétt. Um kvöldið er svo stefnt að því að kíkja í búðir, pakka og undirbúa brottför því á mánudagsmorgunn höldum við af stað áleiðis til Íslands. Ræs er áætlað klukkan 05 þann daginn og erum við þegar farin að hlakka til!

Þetta verða því væntanlega síðustu fréttir okkar héðan frá Chile en þó er svissneskur vinur okkar og vefstjóri skátamiðstöðvarinnar í Kandersteg með fjölda mynda af íslenska hópnum sem náðist ekki að senda áður en mótinum lauk. Hann mun því senda þær til íslenska skátavefsins um leið og hann nær að tengjast netinu sem verður einhvern tímann á næstunni. Við hvetjum því alla til að fylgjast vel með vefnum.

Sjáumst hress um fjögurleytið á þriðjudaginn 12. janúar eftir hádegi í Leifsstöð.

Salutas de Santiago,

Chilefarar

Uppfært: 10. janúar, 1999 - 16:15 GMT. © 1998 - Netnefnd BÍS - Guðmundur Jónsson Afritun án heimildar er leyfð ef Skátavefsins er getið með endurbirtingu efnis. Reproduction of material without permission authorized, giving credit to "www.scout.is".